English印衫指南
擺脫配色車禍
2 月
各位要設計班衫既小薯仔有無曾經比配色呢個問題搞到頭都痕埋？今日小編決定要集畢生所學整合幾種簡單易上手既配色方法分享俾各位小薯仔。
1. 對比色/互補色
對比色/互補色就係呢個色環入面相對成180°既一組色，例如紫色同黃色係對比色，藍色橙色係對比色，紅色對比色係綠色（唔好再誤會紅藍係對比色喇 ），有左對比色輔助配色方向系咪開始有眉目？
對比色應用
知道選色方向後未必立即完成到一個滿意既設計，根據多年經驗,如果直接應用色環入面既顏色同自殺冇分別，所以我地應該要根據已有既顏色方向做調整，嘗試不同深淺明暗既對比色組，慢慢就可以摸索到你想要既效果，以下小編會提供三種應用方法。
1.衣服顏色與圖案顏色做對比
簡單黎講就係衫一隻色，圖案用對比既顏色，依個方法簡單又顯眼，一啲由簡單線條組成既設計圖，再都唔洗驚無人睇到啦。
2.對比色組漸
Logo唔一定要靠線條粗幼/多少構圖複雜黎豐富logo，漸變色一樣有相同既作用，肥而不膩大概就係甘既意思。
3.以衫色做基色情況下用對比色
依個方法聽起上黎有啲難度，不過用落都十分簡單，首先大家揀一個同衫既顏色想近既顏色成為圖案一部份既顏色，然後再揀對比既顏色係需要特出既圖案部份就可以架喇。
如果有一日你設計靈感猶如泉涌，創作左一個又一個驚天地泣鬼神既圖案，甘呢個時候你就需要對比色幫你突出重點，避免喧賓奪主既問題喇。另外光暗，顏色深淺同樣可以係對比色既一種，適當運用可以有千萬種好睇既配色共你選擇。
2.鄰近色/類似色
鄰近色/類似色就係色環入面相距30°既一組色，例如紫/紫紅/紅係一組鄰近色，寶藍色/寶石藍/水綠色係一組鄰近色，青綠/明黃色/橙黃色係一組鄰近色,簡單黎講三個連住既顏色就係鄰近色。
鄰近色應用
如果對比色係要特出主題，甘鄰近色就係要共容，將主題融入整個作品唔hard sell，鄰近色因爲溫和既原因，直接用都唔會炒車，不過咁樣可能會顯得懶惰同唔夠個性，做設計時同樣可以反覆試唔同既組合既深淺明暗，務求達到完美，同樣提供三種應用方式。
1.顧及大中細字體圖案
相信大家睇到上圖時一定中間黃色圖吸引左眼球，經常一唔小心就睇到黃色衣架個鉤而忽略左其他資訊，呢個就係對比色既威力。如果所以想避其鋒芒，第一組應用就可謂最合適，可以一見睇哂所有圖案既資訊，大家可以用只手遮住其中一個反覆比較，就可以睇到分別喇。
2.鄰近色漸變
如果唔係配色高手，用對比色做漸變色分分鍾炒車，但鄰近色做漸變色就 絕！對！無！問！題！而且好靚，以上面中間既圖案為例，漸變色因爲有深淺差別，所以可以起到延伸引渡作用，觀衆大多數會由淺色跟住深色方向觀看圖案。
3.雙色設計
最右面既圖案同樣因爲有深淺差別，細緻位用淺大位用深，圖案會因爲深淺對比原理，凸顯到細緻既地方，同時又因爲鄰近色一體感強，唔會導致圖案太分離，同時又豐富到圖案，一次過滿足你三個願望。
3.Tone on Tone/撞色
Tone On Tone 意思就係冬甩入面，求其一隻色原地自轉一圈，即係綠色撞綠色，聽落就好刺激，好多小薯仔設計都忙住要特顯，要大，要好大，其實想與衆不同又洗乜諗甘多，反其道而行唔會更顯得你地有創意咩？
如果你地睇到依段文字，相信你地都會明白咩係Tone on Tone喇
如果對比色係爭強好勝，鄰近色係只求世界和平，甘TOT就係I am who I am，與眾不同既佼佼者，咁我地要點樣應用先顯得我地係正常人呢? 首先你要了解我地Helios製衣公司提供超過30種不同印刷工藝，每一種印刷都有唔同質感，不同質感同衫質地對比，會刷出不同的火花。以下小編就舉其中一個例子。呢件衫係一個設計師結婚用，風衣布加刺繡，撞色令到圖案顯得若隱若現，引起觀衆探求心，更加吸引到觀衆眼球．
4.搵圖片參考
如果以上三種方法睇唔明都唔緊要，可以全部忘記佢，仲有第四種方法。首先你要決定衫要咩色，例如你要藏藍色， 然後求其上網搵張圖（藍色主色），選取圖入面組成既顏色黎配搭，一張優秀既圖片，用色一定會運用到上述既技巧，所以實食無癡牙。
5.搵我地幫手
okokok！講甘多都係唔清楚唔緊要，你仲可以用方法五，俾錢請小編幫你設計，即刻用上面既whatsapp按鈕聯絡我地啦。
